4 Visado Coa bolsa da Fundación obtense un visado J1. Normalmente a entidade que patrocina o visado é o IIE (Institute of International Education). A súa persoa de contacto cos bolseiros da Fundación é Patricia Link. Para consegui-lo visado, hai que escribir ou ir á Embaixada de Estados Unidos en Madrid. A documentación necesaria para solicitar ou renova-lo visado e que tedes que presentar na embaixada norteamericana é a seguinte: Modelo IAP66 (que envía o IIE). Impreso xeral para o visado, que debedes recoller na propia embaixada ou nalgún consulado. 1 fotografia. Pasaporte. Unha taxa, que varía en función da cotización do dólar, e adoita rolda-los 25 euros. Ás veces a algúns bolseiros devólveselles toda esta documentación, indicando que falla un certificado do patrocinador, no que se faga consta-la dotación da bolsa. Pero non cómpre un certificado noso, xa que o que cobre a bolsa figura no IAP66 que envía o IIE, polo que se fai innecesaria unha certificación nosa. Ademais do J1, existe outro visado para estudiantes sen bolsa (F1). As diferencias entre eles non son moitas, e delas podemos destacar dúas: O cónxuxe dun estudiante con visado J1 pode traballar en Estados Unidos, cousa que non poderá facer en ningún caso un estudiante cunha F1. Despois de ser un estudiante cun visado J1, pódese traballar nun practical training durante 18 meses (36 se se trata dun doutoramento). Para isto, necesítase te-la oferta dunha empresa ou institución, como máximo ó mes seguinte de remata-los estudios. Cunha F1 só se ten dereito a doce meses de practical training, pero non hai restriccións de cando se recibe a oferta. Pódese conseguir máis información sobre visados para non inmigrantes na Embaixada americana ou nesta outra da Secretaría de Estado dos Estados Unidos.